И.Я.Яковлев пĕтĕм чун хавалĕпе, шухăш-кăмăлĕпе чăваш чунĕллĕ ҫын пулнă. Çавăнпа та, ватăлса вилсессĕн те, халăх йăлипе, пурнăҫ тăршшĕпе ҫĕкленĕ ĕҫшĕн хăйне тав туса асăнасса шаннă.Халăхра: «Пиллесессĕн пин пулнă, пиллемесен кĕл юлнă»,- тенине асра тытса Чун халалĕ – пехил ҫырса хăварнă вăл. Чăваш халăхне чунран юратни, унран хаклине урăх никама та курманнине пĕлтерет ку.

     Ака уйăхĕн 20-мĕшĕнче Елчĕкри вăтам шкулта вĕренекенсем хушшинче  И.Я.Яковлевăн «Чăваш халăхне» чун халалĕ тăрăх вулав урокĕ иртрĕ. Вулава 5-10 класра вĕренекенсем хутшăнчĕҫ. Вĕренекенсем халала виҫĕ чĕлхепе вулама пултарчĕҫ: чăвашла, вырăсла, акăлчанла.

     Яковлев вĕрентĕвĕ вилĕмсĕр.Унăн «Чăваш халăхне» чун халалĕ пирĕншĕн пурнăҫ кĕнеки пулса тăчĕ. Вăл ĕмĕр-ĕмĕр тăван халăха, тăван ҫĕр-шыва юратма, уншăн пĕтĕм чун-чĕре хавалне пама хистесе тăрать. Пире, ҫамрăксене, ăс парать, лайăх ĕмĕтпе пурăнма вĕрентет, малашлăхра ырă ҫитĕнÿсем тума хавхалантарать.