Кам тǎван чĕлхене юратмасть-

Вǎл тǎван амǎшне юратмасть.

Кам тǎван амǎшне юратмасть-

Вǎл тǎван халǎхне юратмасть.

Кам тǎван халǎхне юратмасть-

Вǎл тǎван çĕршыва юратмасть

Пирĕн тǎван чĕлхе – чǎваш чĕлхи. Эпир мĕн пĕчĕкрен чǎвашла калаçса ÿснĕ.Чǎваш чĕлхи- атте-анне чĕлхи.Тǎван чĕлхе – чи çепĕç те илемлĕ чĕлхе. Мĕн тери илĕртÿллĕн янǎрать вǎл. Пирĕн хамǎр тǎван чĕлхепе яланах мухтанмалла, ǎна упрама тǎрǎшмалла. Çакна шута илсе Елчĕкри пĕтĕмĕшле пĕлÿ паракан вǎтам шкулǎн 7 «а» класĕнче  вĕренекенсемпе «Пин чĕлхерен чи ҫепĕҫҫи» ятпа краеведени сехечĕ иртрĕ.  Кушманова Н.В. И.Я.Яковлевăн пурнăҫĕпе пултарулăхĕ ,литературăри ĕҫĕ-хĕлĕ,Чĕмпĕр чăваш шкулĕн историйĕ   ҫинчен каласа кăтартрĕ,презентаци куравĕ иртрĕ.     Ачасемшĕн чи кǎсǎкли  – И.Я.Яковлев ачалǎхĕ пулчĕ. Тĕлĕнмелле – пирĕн  Аслǎ  Вĕрентекенĕмĕр те вĕсем пекех шкула çÿренĕ вĕт-ха, вĕсем пекех вылянǎ, кулнǎ.  И.Я.Яковлев пĕчĕклех тǎлǎх ача пулса юлни вĕренекенсене пǎшǎрхантарчĕ. Чǎнах та, Пахомовсен усрав ачи пулса ÿснĕ вǎл, пурнǎç тути-масине аванах ас тивнĕ. Сакǎр çултах лашапа ака-суха тунǎ, çурлапа тырǎ вырнǎ, çǎпата та хуçнǎ. Хресчен ĕçĕ мĕн тери йывǎр пулнине чĕрипе туйса ÿснĕ.И.Я.Яковлев нумай ĕҫленĕ,вуншар ҫын тăвайманнине пĕччен тунă.Чăвашсемшĕн чăн-чăн Улăп паттăр пулса тăнă.Вĕсемшĕн ялан чун-чĕрипе ҫуннă,пуласлăхшĕн ывăнма пĕлмесĕр шухăшланă,ĕмĕрлĕхех ăс вĕрентсе халал ҫырса хăварнă.

 Урок вĕçĕнче вĕренекенсем тǎван чĕлхепе мǎнаçланма, хǎпартланма, хǎйсем чǎваш пулнипе мухтанма сǎмах пачĕç.