Районти тӗп библиотекӑра Чăваш Республикин тава тивĕçлĕ экономисчĕн, Чăваш наци академийĕн пайташĕн, тĕрлĕ наукăпа кăсăкланакан Валерий Иванович Салминӑн ӗҫӗсен «Наука ӑслӑлӑх тӗнчинче» ятпа курав хаклавӗ иртрӗ. Хаклава курав авторӗ, унӑн тӑванӗсем, тус-юлташӗсем, Елчĕкри вăтам шкул ачисем тата районти библиотекарьсем хутшӑнчӗҫ.

Валерий Иванович Салмин Патӑрьел районӗнчи Туҫа ялӗнче 1945 ҫулхи ҫӗртме уйӑхӗн 4-мӗшӗнче ҫуралнӑ. Вӑтам шкул хыҫҫӑн 1962 ҫулта И.Я. Яковлев ячӗллӗ педагогика институтне вӗренме кӗрет. Вӗреннӗ хушӑра Совет ҫарӗнче службӑра тӑрать. Ун хыҫҫӑн хӑйӗн пӗлӗвне Чӑваш патшалӑх университетӗнче историпе обществознании факультетӗнче пухать.

Валерий Иванович тӗрлӗ ӗҫре, тӗрлӗ должноҫра: шкулта физика, акӑлчан, истории, географии предмечӗсене вӗрентет; тӑван районӗнчи колхозра экономист; Туҫа ял совечӗн пуҫлӑхӗ; Чӑваш патшалӑх университечӗн Патӑрьелӗнчи филиалӗнче социаллӑ-гуманитари факультечӗн аслӑ преподавателӗнче вӑй хурать. Ӗҫне кура хисепӗ. Патшалӑх Валерий Ивановича тӗрлӗ наградӑсемпе медальсем парса чыс тунӑ.

Валерий Салмин – Чӑваш Республикин тава тивӗҫлӗ экономисчӗ, Чӑваш наци академийӗн пайташӗ, тӗрлӗ наукӑпа кӑсӑкланакан ҫын. Ватлӑха парӑнман хастар хӑйӗн кил хуҫалӑхӗче Шуршӑлти космонавтика музейӗн пӗчӗк уйрӑмне уҫнӑ.

Маларах килӗнче йӑх музейне туса хатӗрленӗ. Вӗсен кил- йышӗ тарӑн та ҫирӗп тымарлӑ, тӗрлӗ ӗҫре ырӑ ята тивӗҫнӗ ентешсем ҫинчен ҫамрӑк ӑрӑва каласа кӑтартмалӑх экспонат кунта ҫителӗклех.

«Хӑвӑн умӑнта мӗнле те пулин тӗллев лартрӑн тӑк ҫакна пурнӑҫлама ӑнтӑлмалла, тӑрӑшмалла. Пуç ĕçленĕ чухне шухăшламалла», — тет Валерий Иванович. Хальхи çамрăксемпе килес ăрусем вали тума палăртни унăн темĕн чухлех. Валерий Салмин чӑннипех те маттур та пултаруллӑ ҫын. Тӗл пулура та вӑл юлташӗсемпе пӗрле юрласа пухӑннисенес авӑнтарчӗҫ.

Мероприятине  хутшӑннисем куравпа паллашнӑ май, ӑслӑлӑх ӗҫӗнче Валерий Салмина ӑнӑҫусем сунчӗҫ.