Раштавăн 7- мĕшĕнче «Хыпар» Издательство çуртĕнче «Хÿтĕлев чиккисем пирки пĕлетĕр-и?» викторина çĕнтерÿçисене чысларĕç. Ăна „Хыпар“ хаçат редакцийĕ Сăр тата Хусан хÿтĕлев чиккисене тума пуçланăранпа 80 çул çитнине халалласа йĕркеленĕччĕ.

Викторинăна республикăн тĕрлĕ районĕнче пурăнакан çирĕм ытла çын хутшăннă. Çав шутра шкул ачисем те, ĕçлекен ÿсĕмрисемпе тивĕçлĕ канурисем те пур. «Хыпар» Издательство çурчĕн директорĕ — тĕп редакторĕ Татьяна Вашуркина çĕнтерÿçĕсене — Красноармейски районĕнчи Красноармейски шкулĕн чăваш чĕлхи вĕрентекенне Зинаида Михайловăна, Елчĕк районĕнчи Елчĕк шкулĕн ют чĕлхесен вĕрентекенне Татьяна Лапшинана, Комсомольски районĕнчи Тăманлă Выçли шкулĕн вĕрентекенне Людмила Коноваловăна — саламларĕ. Вĕсене викторинăна хутшăннăшăн тав турĕ, Диплом тата парне парса чысларĕ.

Викторина çĕнтерÿçисем учитель пулнă май хăйсем ĕçлекен шкулта вĕренекенсене Сăр тата Хусан хÿтĕлев чиккисем пирки ытларах пĕлччĕр тесе тĕрлĕ мероприяти ирттерни пирки каласа кăтартрĕç. Çĕнтерÿçĕсем «Хыпарçăсене» викторина йĕркеленĕшĕн тав сăмахĕ каларĕç, тавра курăма анлăлатма пулăшакан конкурссене татах та хутшăнма хирĕç маррине пĕлтерчĕç.