Ачалӑх –телейлĕ тĕнче, юлать асӑнмалӑх кашнин чĕринче. Паян - пĕтĕм тĕнчери ачасене хÿтĕлемелли кун! Ку – питĕ пĕлтерĕшлĕ уяв. Ачасем пире телей парнелеççĕ, пурнӑçа пĕлтерĕш кÿреççĕ. Шанӑçпа ĕмĕтсем,çутӑ пуласлӑх кĕтни те вĕсемпе çыхӑннӑ. Çĕртме уйӑхĕн пĕрремĕшĕнче Елчĕкри вӑтам шкулти улттӑмĕш кадет класĕнче вĕренекен Адюкова Машӑпа Патшин Даниил Чӑваш наци телевиденийĕпе пыракан «Ир пулсан» кӑларӑмӑн тÿрĕ эфирне хутшӑнчĕç. Вĕсем шкул пурнӑçĕпе паллаштарчĕç. Хӑйсем мĕнпе кӑсӑкланни, тĕрлĕ-тĕрлĕ конкурссенсе хутшӑнни,  пĕр класра вĕренекен ачасен туслӑхĕ çинчен каласа пачĕç. Умра çуллахи каникул. Ачасем çак хаваслӑ вӑхӑта  мĕнлерех ирттерме палӑртни çинче чарӑнса тӑчĕç.

Машӑпа Даниил «Çӑлтӑрчӑк» кӑларӑма ертсе пыраççĕ. Хӑйсем çак ĕçе пуçӑнса йĕркелесе пыни çинчен хаваспах палӑртрĕç. Кӑларӑмĕсенче вĕсем республикӑри пултаруллӑ ачасемпе паллаштараççĕ. Тĕрлĕ районсене çитсе унти çĕнĕ пулӑмсем, ачасен ĕçĕ- çитĕнĕвĕсем çинчен хыпарлаççĕ. Çамрӑк корреспондентсем Чӑваш наци телевиденийĕпе кашни тунтикун эфира тухакан кӑларӑма пӑхма сĕнчĕç.