Ҫепӗҫӗн, сулмаклӑн,

Савӑккӑн, хӑватлӑн

Янӑратӑн эсӗ, ман тӑван чӗлхем.

Тимӗре тататӑн,

Чул сӑрта вататӑн,

Сӱннӗ вучахра та эс чӗртен хӗлхем!

Мӗн тери илемлӗн, мӗн тери хӑватлӑн, мӗн тери мӑнаҫлӑн янӑрать пирӗн тӑван чӗлхе.  Ака муйӑхӗн 20-мӗшӗнче Елчӗкри пӗтӗмӗшле пӗлӱ паракан вӑтам шкулта чӑваш чӗлхи эрни пуҫланчӗ. Ачасем  дистанци мелӗпе вӗренеҫҫӗ пулсан та, ҫак эрнене тивӗҫлӗ шайра ирттересчӗ тесе тӑрӑшаҫҫӗ. Чӑваш чӗлхи эрнинче нумай ӗҫ тума палӑртнӑ. Кашни вӗренекен тӗрлӗ конкурса, викторинӑна хутшӑнса хӑйсен пултарулӑхне кӑтартма, пӗлӗвне тӗрӗслеме пултарать. Ӗҫсене тӗрлӗ ӱсӗмри ачасем валли хатӗрленӗ.

Эрнене эпир сӑвӑ вулакансен конкурсӗнчен пуҫлӑпӑр. И.Я.Яковлев, Ҫеҫпӗл Мишши, К.В.Иванов пултарулӑхӗсем тӑрах хатӗрленӗ викторина та кӑсӑклӑ иртессе шанас килет. Г.Волков хайлавӗсем тӑрӑх ӱкерчӗксем тума кӗҫӗн классене йыхравлӑпӑр. Ҫавӑн пекех вӗренекенсене  «Ҫыратпӑр сӑвӑ хамӑрах» конкурса хутшӑнма та чӗнетпӗр.

Чӑваш чӗлхи эрни пуриншӗн те усӑллӑ, тухӑҫлӑ иртессе шанас килет. Ӑнӑҫу сире, хаклӑ ачасем!