Ҫăварни –  чăвашсен чи асамлă та савăнăҫлă уявĕ. «Ҫăварни» тени тепӗр майлă «ҫу эрни», «хӗле ăсатни», ҫуркуннене кӗтсе илни.  Кашни тăрăхра вăл тӗрлӗрен иртме пултарнă, ҫавна пула ачасене вырăнти юрра-ташша вӗрентни тӗп вырăн йышăнать. Пирӗн хамăр тăрăхри юрăсене сыхласа хăварма тăрăшмалла. Ҫавăн чухне кăна эпир чăвашлăха, йăла-йӗркене, авалхи сăмахлăха сыхласа хăварма пултаратпăр. Чăвашăн Ҫăварни уявӗ вырăссен Масленица уявӗпе, урăхла каласан хӗле ăсатнипе тӳр килнӗ. Уявăн чи пĕлтерĕшлĕ пайĕ -  çуллă икерчĕ. Икерчĕ хĕл каçа тунсăхласа çитнĕ сар хĕвел евĕр.

Пуш уйăхĕн 6 – мĕшĕнче Елчĕк шкулĕн Кĕçĕн Таяпа ялĕнчи ачисем Çăварни уявне пуçтарăнчĕç. Вĕренекенсемпе ача садне çӳрекенсем,  вĕрентекенсемпе ашшĕ-амăшĕсем  уява питĕ тăрăшса хатĕрленчӗç: сăвă-юрă вӗренчӗç, тӗрлӗ икерчӗ пӗçерчӗç, уяв тум-тирӗ хатӗрлерӗç.  Паян вара пурте савăнăçлă, хăйсем мӗн пултарнине   тӗрлӗ вăйăра, юрă-ташăра кăтартма  пултарчӗç,   вăй-халне тӗрӗслерӗç. Классенчи  асчасем уяв сӗтелӗ хатӗрлесе ăмăртрӗç, пӗр-пӗрне хăналарӗç. Уяв вӗçӗнче Çăварни карчăкне çунтарса чир-чӗре, инкек-синкеке хамăртан хăваларăмăр, капăрлатнă лашасемпе ял урамӗсем тăрăх катаччи те чупрăмăр.Уяв çав тери илемлӗ те савăнăçлă иртрӗ.