Кăрлач уйăхĕн 11- мĕшенче Хăвăлçырмари тĕп шкулта чăваш чĕлхипе литературине вĕрентекенсен черетлĕ ларăвĕ иртрĕ.

  Семинара районти вĕренÿпе çамрăксен политикин пайĕн тĕп специалисчĕ Фаина Цыганова уçрĕ. Вăл 2017 çул чăваш чĕлхине вĕрентекенсемшĕн тухăçлă пулнине, чылайăшĕ пысăк ÿсĕмсемпе палăрса юлнине, район шайĕпе асра юлмалли мероприятисем нумай иртнине асăнса хăварчĕ, малашнехи ĕçре пурне те çитĕнÿсем туса пыма сунчĕ.

  Унтан шкулăн спортри, тĕрлĕ шайри конкурссенчи, предмет олимпиадăсенчи çитĕнĕвĕсемпе шкул директорĕ Геннадий Ловкин туллин паллаштарчĕ.

  Семинар ĕçĕ Иван Яковлевич Яковлевăн халалне итленинчен пуçланчĕ. Шкулпа çемье тачă çыхăнса ĕçленине чăваш чĕлхипе литературине вĕрентекен Зинаида Михеева ятарласа хатĕрленĕ презентацире уçса пачĕ.

  Чăваш чĕлхин паянхи саманари вырăнĕпе пĕлтерĕшĕ пирки Ассоциаци ертÿçи Анна Портнова каласа пачĕ, ăна патшалăх чĕлхи пек вĕрентесси çинче Елена Федорова чарăнса тăчĕ. Уроксенче усă куракан çĕнĕ технологисемпе Нина Левая, Вера Воронова, Анна Портнова вĕрентекенсем паллаштарчĕç. Вĕсем ирттернĕ мастер- классем пур вĕрентекенсемшĕн те усăллă та курăмлă пулчĕç. Малашне татах та пысăк хавхаланупа ĕçлес кăмăлпа саланчĕç семинара хутшăннисем.