Ехрем хуçа – XIX ĕмĕрте пурǎннǎ тĕлĕнмелле пултаруллǎ чǎваш – Шупашкарта чи илемлĕ çуртсем хǎварнǎ. Халĕ асǎннǎ хулара ун ячĕпе бульвар та пур. Анчах та, шел пулин те, ун пурнǎçĕ çинчен эпир пит пĕлсех каймастпǎр. Çакна тĕпе хурса, унǎн пурнǎçĕпе çывǎхрах паллашас тĕллевпе, Елчĕкри пĕтĕмĕшле пĕлÿ паракан вǎтам шкулǎн 11-мĕш «э» класĕнче вĕренекенсем Шупашкарти илемлĕ çуртсен хуçи çинчен Вячеслав Оринов режиссер  ÿкернĕ фильма пǎхма кǎмǎл турĕç. «Ехрем хуçа» фильмра хуçан пĕр кунне сǎнласа панǎ. Ĕçлеме пĕлекен, халǎхшǎн, пуласлǎхшǎн çунса тǎракан паллǎ чǎваш купцине курайман, ǎмсанакан çынсем те чылай пулнǎ. Сас-хура тǎрǎх Ехрем хуçана хулара суя укçасем сарнǎшǎн та, банка панкрута кǎларнǎшǎн та тĕрмене хупма пултараççĕ имĕш. Вĕренекенсем çынсем пĕр-пĕринчен мĕнле кĕвĕçме пултарнине хǎйсен куçĕпе курса ĕненчĕç. Ехрем хуçана сутакан Иевлев дворянина пĕр хурларĕç, пĕр питлерĕç вĕсем. Анчах та хуçан аслǎ ывǎлĕ Иевлевǎн хĕрĕпе туслине пĕлсен вара çамрǎксене шеллерĕç те. Мĕн тумалла пĕр-пĕрне юратакан чĕресен кун пек чухне? Паллах, вĕренекенсем кунта хǎйсен шухǎшĕсене пĕлтермесĕр чǎтса тǎраймарĕç. Вĕсен умне пĕр тĕп ыйту тухса тǎрать: аслисен хирĕçтǎрǎвĕ е çамрǎксен юратǎвĕ çиеле тухать? Чǎнлǎх, паллах, çĕнтерет, анчах, шел пулин те, çухатусǎр та пулмасть.

  «Ехрем хуçа» фильм вĕренекенсене питĕ килĕшрĕ. Уйрǎмах вĕсене Василий Павлов купца рольне ĕненмелле выляни кǎмǎла кайрĕ. Вĕсем малашне те чǎвашсем çинчен ÿкернĕ фильмсене курса класпа сÿтсе явма калаçса татǎлчĕç.